Umhverfið & staðurinn / Things to do

Esparron de Verdon er lítill, falinn gimsteinn í hjarta efra Provence. Þorpið er í 350 m hæð og stendur við vatn sem ber heiti þorpsins, Lac d’Esparron.
 

Vatnið var gert af franskri Landsvirkjun seint á sjöunda áratug síðustu aldar og hefur gerbreytt ásýnd þorpsins til hins betra. Sjálft þorpið byggðist eins og flest frönsk þorp í kringum kastala sem reistur var á 13. öld, á svipuðum tíma og Snorri Sturluson skrifaði Eddu í Reykholti. 

Helsta tekjulind kastalaherrans var brúartollur af hverri kind en vaninn var og er enn að reka allt fé til fjalla upp í Alpana á vorin og svo aftur til byggða á haustin. Fjárhirðar fylgja raunar hjörinni allt árið. Nú er þessi brú á 30 metra dýpi í gljúfrinu  en Verdon-gljúfrið og vatnið eru eftirsótt til alls kyns siglinga og sunds.

Þorpið er agnarlítið en státar þó af þremur ágætum veitingastöðum, búð, bakaríi og “alt mugligt”-verslun auk minjasfns, keramik-verkstæðis og vinnustofum listmálara að ógleymdu góðu félagsheimili þar sem oft eru haldin böll og aðrar uppákomur.

Þar (og í kastalanum) hef ég skipulagt íslensk-franskar tónlistarhátíðir undanfarin 6 ár.

Segja má að hjarta þorpsins slái í tveimur samliggjandi boules-völlum en þar spila þorpsbúar og gestir pedanque eða einfaldlega “boules” daglega nema þegar rignir (sem er u.þ.b. 15 sinnum á ári).

Þorpslífinu hér er best lýst með orðinu friðsæld að því undanteknu að í júlí og ágúst koma kannski fullmargir gestir en þá er líka líf og fjör og þorpið iðar af lífi.

Landslag í Efra-Provence er mjög sérstætt. Þar skiptast á hásléttur þar sem ræktað er hveiti eða lavender og dalir þar sem ræktaður er vínviður eða ávextir. Jarðvegur er hrjóstrugur en samt er landið allt skógi vaxið, mest sígrænum eikar- og furuskógi. Hér er því alltaf grænt og himinninn nær alltaf blár.

Náttúrufegurð er mikil og þorpin fjölbreytt og bera ríkulegar menjar, einkum eftir Templar-riddaranna sem hér réðu ríkjum um aldabil. Rómuð náttúrufegurð er ekki síst í Gorges de Verdon sem eru skammt frá.

Á vetrum er stutt á fjölmarga skíðastaði og á sumrin er klukkutímaakstur til strandar, t.d. til St Tropez eða Nice (tæpir tveir tímar).

Góður golfvöllur (Pierrevert) er í um hálftíma akstursfjarlægð.

Lærðu smá frönsku áður en þú ferð af stað!

BBC býður upp á skemmtilegt námsefni í frönsku fyrir byrjendur sem lengra komna. Einnig er hægt að mæla með námefninu Talk French (bók + geisladiskar) fyrir ferðalanga, með öllu því helsta sem þarf til að bjarga sér.

Gönguferð um Provance

GÖNGUFÓLK ATH!