Í janúar og febrúar árið
2004 dvöldumst við hjón í
minni íbúðinni í ágætu
húsi Ármanns Ármannssonar í Esparron de Verdon. Við vorum þar í orlofi,
gangandi og akandi í friðsæld og fegurð staðarins, í forvitinni hvíld.
Sú umhverfisdýrð gleymist seint:
Miðaldagötur hins litla þorps, stöðuvötnin, Verdon-gljúfrin miklu,
sveitamarkaðurinn í Riez og víðar, Svarta Madonnan í Manosque, Gamli
Sorrí Gráni við Kastalann og þannig má lengi telja.Hildur
Hákonardóttir og Þór Vigfússon,
Straumum Ölfusi. |
 |
|
Það er
ákaflega fallegt í Esparron og nágrenni enda vinsælt ferðamannasvæði. Á
veturna er minna um að vera og afar friðsælt. Við dvöldum þarna mars og
apríl 2004 við skriftir, þýðingar og lestur og hentaði kyrrðin afar vel.
Við nutum þess að fara í langar gönguferðir meðfram vatninu og að fara í
bíltúra til smábæja og þorpa í grenndinni. Um helgar lifnaði svæðið við
og þá var skemmtilegt að fara á sveitamarkaðinn í nálægum smábæ.
Við
héldum til á jarðhæð í stórglæsilegu húsi Ármanns í Esparron. Íbúðin er
lítil en öllu haganlega fyrirkomið. Veðrið er nokkuð breytilegt á þessum
tíma ársins, hitinn gat oft farið upp í 15°-20° og vel hægt að sitja úti
við vinnu. Á kvöldin var allmiklu svalara og þá er gott að geta kveikt
upp í arni.
Bera og Njörður P. Njarvik
|
 |
|
Eitt sinn sagði
faðir minn við mig að ef maður hlakkaði ekki til að fara heim, þá væri
eitthvað að heimafyrir. Mér fannst þetta mjög rétt hjá honum þar til ég
dvaldi í húsi Ármanns og Nathalie í Esparron de Verdon. Þá langaði mig
ekkert til þess að fara aftur heim!
Esparron
er lítið dásamlegt fjallaþorp við samnefnt vatn. Allt í kring er fullt
af áhugaverðum stöðum. Gaman er að ráfa um þrönga göngugötuna í Greoux
þar sem fullt er af verslunum og veitingastöðum. Tourtour er líka
ákaflega fallegur bær og enginn ætti að láta Moustiers de St. Marie
framhjá sér fara. Ekki má svo gleyma náttúrugersemi á borð við stóru
gljúfrin í Verdon eða Le Grande Canyons de Verdon eins og þau kallast á
frönsku. Það eru stærstu gljúfur í Evrópu og þau næst stærstu í heiminum
á eftir Grand Canyon í Bandaríkjunum.
|
Esparron de Verdon
er mjög vel staðsett. Stutt er til allra átta og t.d. er einungis 3 tíma
akstur til St. Tropez á frönsku rívierunni og til Mónakó.
Það er nóg hægt að
gera allt í kring Esparron og sögufrægir staðir allt í kring.
Ég mæli með því að fólk kaupi sér ferðahandbók um Provence sem fæst í
hverri góðri bókabúð til þess að missa ekki af öllu því sem hægt er að
skoða og gera þarna á meðan á dvöl stendur. Nú svo er líka gott að
slappa bara af á veröndinni, lesa góða bók og drekka rauðvínsglas á
meðan börnin busla í sundlauginni.
Við hjónin og börnin
gefum dvöl okkar í húsi Ármanns og Nathalie í Esparron og
hæstu einkunn og bestu meðmæli!
Ragnar
Thorarensen og Sigríður Axelsdóttir
|